भंडाऱ्यातील पोलीस कवायत मैदानात स्वातंत्र्य दिनानिमित्त भव्य पोलीस परेडचे आयोजन करण्यात आले. परेडनंतर राज्याचे वस्त्रोद्योग मंत्री व भंडाऱ्याचे पालकमंत्री संजय सावकारे यांच्या हस्ते ध्वजारोहण सोहळा उत्साहात पार पडला. यावेळी नव्याने नियुक्त जिल्हाधिकारी सावन कुमार, पोलीस अधीक्षक नुरुल हसन, खासदार प्रशांत पडोळे यांच्यासह विविध शासकीय विभागांचे अधिकारी व कर्मचारी मोठ्या संख्येने उपस्थित होते. पोलीस दलाच्या तुकड्यांनी आकर्षक मार्चपासून ते विविध कौशल्यपूर्ण सादरीकरणांपर्यंत प्रभावी कामगिरी सादर केली. उपस्थित मान्यवरांनी देशभक्तिपर भाषणे करत नागरिकांना एकतेचा व विकासाचा संदेश दिला. मैदानावर देशभक्तीपर गाणी आणि घोषणांनी देशप्रेमाचा माहोल भारावून गेला. हा सोहळा शिस्त, उत्साह आणि ऐक्याचा सुंदर संगम ठरला.
